Checkup ng Sanggol na Walang Sakit: 2 Buwan

Pag-unlad at mga tagumpay

Magtatanong ang tagapangalaga ng kalusugan tungkol sa iyong sanggol. Babantayan niya ang sanggol upang magkaroon ng ideya tungkol sa pag-unlad ng sanggol. Sa pagbisitang ito, malamang na ginagawa ng iyong sanggol ang ilan sa mga sumusunod:

• Sadyang pagngiti, tulad ng pagtugon sa ibang tao (tinatawag na ngiting pakikipagkapwa)

• Paggalaw ng parehong braso at binti

• Pagtingin sa iyo habang gumagalaw ka sa paligid ng silid

• Pagtingala ng ulo habang nakadapa

• Paggawa ng ingay maliban sa pag-iyak

Mga payo sa pagpapakain

Ituloy na pakainin ang iyong sanggol alinman sa gatas ng ina o formula. Upang matulungan ang iyong sanggol na kumain nang mabuti:

• Sa araw, pasusuhin nang hindi bababa sa bawat 2 hanggang 3 oras. Maaaring kailanganin mong gisingin ang sanggol para sa pagpapasuso sa araw.

• Sa gabi, pasusuhin kapag nagising ang sanggol, madalas tuwing 3 hanggang 4 na oras. OK lang na matulog ang iyong sanggol nang mas mahaba kaysa rito. Malamang na hindi mo siya kailangang gisingin para sa pagpapasuso sa gabi.

• Dapat tumatagal ang mga sesyon ng pagpapasuso ng 10 hanggang 15 minuto. Gamit ang bote, bigyan ang iyong sanggol ng 4 hanggang 6 na ounce ng gatas ng ina o formula.

• Kung nag-aaala ka tungkol sa kung gaano karami o kadalas kumain ang iyong sanggol, talakayin ito sa tagapangalaga ng kalusugan.

• Itanong sa tagapangalaga kung dapat uminom ang iyong sanggol ng bitamina D.

• Huwag bigyan ang iyong sanggol ng anumang makakain maliban sa gatas ng ina o formula. Napakabata pa ng iyong sanggol para sa matitigas na pagkain (solids) o iba pang likido. Hindi dapat bigyan ng karaniwang tubig ang maliit na sanggol.

• Dapat mong malaman na maraming sanggol na 2 buwan ang sumusuka pagkatapos kumain. Sa karamihang kaso, normal ito. Tumawag kaagad sa tagapangalaga kung madalas at sapilitang dumudura ang iyong sanggol. O kung idinudura niya ang kahit ano maliban sa gatas o formula. 

Mga payo sa kalinisan ng katawan

• Dumudumi ang ilang sanggol (may mga pagdumi) nang ilang beses sa isang araw. Dumudumi naman ang iba ng kaunti sa isang beses bawat 2 hanggang 3 araw. Anumang bagay sa saklaw na ito ay normal.

• Ayos lang kung dumudumi ang iyong sanggol nang madalang sa kada 2 hanggang 3 araw kung malusog naman ang sanggol. Ngunit kung nagiging maselan ang sanggol, sumusuka nang higit sa normal, kumakain nang mas kaunti kaysa sa karaniwan, o may napakatigas na dumi, sabihin sa tagapangalaga ng kalusugan. Maaaring tinitibi ang sanggol (hindi makadumi).

• Ang kulay ng dumi ay maaaring mula sa kulay mustasang dilaw hanggang kulay-kape o berde. Kung iba ang kulay nito, sabihin sa tagapangalaga ng kalusugan.

• Paliguan ang iyong sanggol nang ilang beses kada linggo. Maaari mong paliguan nang mas madalas kung mukhang nagugustuhan ito ng sanggol. Ngunit dahil nililinisan mo ang sanggol habang pinapalitan ng diaper, madalas na hindi kailangan ng pang-araw-araw na paliligo.

• OK na gumamit ng banayad (hypoallergenic) na mga krema o lotion sa balat ng sanggol. Huwag pahiran ng lotion ang mga kamay ng sanggol.

Mga payo sa pagtulog

Sa 2 buwan, natutulog ang karamihang sanggol nang humigit-kumulang sa 15 hanggang 18 oras araw-araw. Karaniwang makatulog nang maiikli sa buong araw, sa halip na ilang oras nang minsan. Maaaring maging maselan ang sanggol bago matulog sa gabi, bandang 6 p.m. hanggang 9 p.m. Ito ay normal. Sundin ang mga payo sa ibaba upang matulungan ang iyong sanggol na makatulog nang ligtas at mahimbing:

• Ihiga ang iyong sanggol para sa mga pag-idlip at pagtulog hanggang maging 1 taong gulang siya. Mapababa nito ang panganib ng SIDS, paglanghap ng isang bagay patungo sa baga, at mabulunan. Huwag kailanman ihiga ang iyong sanggol nang patagilid o padapa sa pagtulog o mga pag-idlip. Kapag gising ang iyong sanggol, hayaang dumapa ang iyong sanggol hangga't binabantayan mo siya. Makatutulong ito sa iyong anak na makabuo ng malalakas na kalamnan sa tiyan at leeg. Makatutulong din ito na maiwasan ang pagkadapa ng ulo ng iyong sanggol. Maaaring mangyari ang problemang ito kapag gumugugol ng maraming oras ang mga sanggol sa paghiga na nakalapat ang likod.

• Tanungin ang tagapangalaga ng kalusugan kung dapat mong hayaan ang iyong sanggol na matulog na may pacifier. Ipinapakita na ang pagtulog na may pacifier ay nakakabawas sa panganib ng SIDS. Ngunit huwag itong ibigay hanggang hindi pa naitataguyod ang pagpapasuso. Kung ayaw ng iyong sanggol sa pacifier, huwag siyang pilitin na gumamit nito.

• Huwag maglagay ng crib bumper, unan, maluluwag na kumot, o stuffed toy sa kuna. Maaari itong maging dahilan upang hindi makahinga ang sanggol.

• Nangangahulugan ang pagbigkis na pagbabalot nang hapit sa iyong bagong silang na sanggol sa isang kumot, ngunit may sapat na espasyo upang maigalaw niya ang kanyang balakang at mga binti. Makatutulong sa sanggol ang pagbibigkis na makaramdam na ligtas at makatulog. Maaari kang bumili ng espesyal na kumot na pambalot na dinisenyo upang maging mas mabilis ang pagbibikis. Ngunit huwag gamitin ang pagbibigkis kung ang iyong sanggol ay 2 buwan o mas matanda, o kung kayang gumulong ng iyong sanggol nang mag-isa. Maaaring mapataas ng pagbibigkis ang panganib sa SIDS (syndrome na biglaang pagkamatay ng sanggol) kung gumulong at dumapa ang nakabigkis na sanggol. Dapat maigagalaw pataas at palabas sa balakang ang mga binti ng iyong sanggol. Huwag ilagay ang mga binti ng iyong sanggol na magkasama ang mga ito at tuwid pababa. Pinatataas nito ang panganib na hindi lumaki at ma-develop nang tama ang mga kasukasuan ng balakang. Maaari itong magdulot ng problema na tinatawag na hip dysplasia at dislokasyon. Maging maingat din sa pagbibigkis sa iyong sanggol kung maalinsangan o mainit ang panahon. Labis na maiinitan ang iyong sanggol kapag gumagamit ng makapal na kumot sa maalinsangang panahon. Sa halip gumamit ng mas manipis na kumot o sheet upang balutin ang sanggol. 

• Huwag ilagay ang iyong sanggol sa isang sopa o armchair para matulog. Inilalagay ang sanggol sa mas mataas na panganib ng pagkamatay, kabilang ang SIDS dahil sa pagtulog sa sopa o armchair.

• Huwag gumamit ng mga upuan ng sanggol, upuan sa kotse, mga stroller, infant carriers, o duyan ng sanggol para sa rutinang pagtulog at araw-araw na mga pag-idlip. Maaari itong maging sanhi ng pagharang sa daanan ng hininga ng sanggol o hindi makahinga ang sanggol.

• OK na ihiga ang sanggol sa kama nang gising. OK din na hayaan ang iyong sanggol na umiyak sa kama sa ilang sandali, ngunit hindi mas tatagal sa ilang minuto. Sa edad na ito hindi pa handa ang mga sanggol na umiyak hanggang makatulog.

• Kung nahihirapan ka sa pagpapatulog sa iyong sanggol, humingi ng mga payo sa tagapangalaga ng kalusugan.

• Huwag itabi ang iyong sanggol sa kama (makitulog). Ipinapakita na mas mataas ang panganib para sa SIDS ng pagtatabi sa kama ng sanggol. Sinasabi ng American Academy of Pediatrics na ang mga sanggol ay dapat matulog sa parehong kuwarto ng kanilang mga magulang. Dapat malapit sila sa kama ng kanilang mga magulang, ngunit sa hiwalay na kama o kuna. Dapat isagawa ang setup na ito sa pagtulog sa unang taon ng sanggol, kung maaari. Ngunit dapat mo itong gawin sa unang 6 na buwan man lang.

• Palaging ilagay ang mga kuna, bassinet, at palaruan sa mga lugar na walang panganib. Nangangahulugan ito na walang mga nakabitin na lubid, kawad, o mga kurtina sa bintana. Mapabababa nito ang panganib ng pagkasakal.

• Huwag gumamit ng baby heart rate at mga monitor o mga espesyal na device upang mapababa ang peligro ng SIDS. Kabilang sa mga device na ito ang mga pangkalang, positioner, at espesyal na kutson. Hindi pa napatunayang makakapigil sa SIDS ang mga kagamitang ito. Sa mga bihirang kaso, naging sanhi ang mga ito ng pagkamatay ng isang sanggol.

• Makipag-usap sa tagapangalaga ng kalusugan ng iyong sanggol tungkol sa mga ito at iba pang problema sa kalusugan at kaligtasan.

Mga payong pangkaligtasan

• Upang maiwasan ang mga pagkapaso, huwag magdala o uminom ng maiinit na inumin, gaya ng kape o tsaa, malapit sa sanggol. Pababain ang temperatura ng water heater sa 120.0°F (49.0°C) o mas mababa.

• Huwag manigarilyo o hayaan ang iba na manigarilyo malapit sa sanggol. Kung naninigarilyo ka o ang ibang miyembro ng pamilya, gawin ito sa labas habang nakasuot ng jacket, at alisin ang jacket bago hawakan ang sanggol. Huwag manigarilyo sa paligid ng sanggol.

• Karaniwang mainam na ilabas sa bahay ang sanggol. Ngunit lumayo mula sa mga nakakulong at matataong lugar kung saan maaaring kumakalat ang mga mikrobyo.

• Kapag dinala mo sa labas ang iyong sanggol, huwag masyadong magtagal nang direkta sa sikat ng araw. Panatilihing may takip ang sanggol o pumunta sa lilim.

• Sa kotse, laging ilagay ang sanggol sa upuang nakaharap sa likod. Dapat itong matibay sa upuan sa likod ayon sa mga nakatagubilin sa upuan ng kotse. Huwag kailanman iwanang nag-iisa ang sanggol sa kotse.

• Huwag iwanan ang sanggol sa mataas na ibabaw, tulad ng mesa, kama, o sopa. Maaari siyang mahulog at masaktan. At, huwag iupo ang sanggol sa magalaw na upuan sa mataas na lugar.

• Maaaring hawakan at laruin ng mas nakatatandang mga kapatid ang sanggol hangga't may nakabantay na nasa hustong gulang. 

• Tawagan kaagad ang tagapangalaga ng kalusugan kung mas bata sa 3 buwan ang sanggol at may temperatura sa tumbong na 100.4° F (38° C) o mas mataas.

Mga bakuna

Batay sa mga rekomendasyon mula sa CDC, maaaring makakuha ng mga sumusunod na bakuna ang iyong sanggol sa pagbisitang ito:

• Dipterya, tetano, at pertussis

• Haemophilus influenzae type b

• Hepatitis B

• Pneumococcus

• Polio

• Rotavirus

• Respiratory syncytial virus (RSV) monoclonal antibody

Itanong sa tagapangalaga ng kalusugan ng iyong sanggol kung aling mga bakuna ang ipinapayo sa pagbisitang ito.

Tumutulong ang mga bakuna na panatilihing malusog ang iyong sanggol.

Nakatutulong ang mga bakuna (tinatawag ding mga pagbabakuna) sa katawan ng sanggol na makabuo ng mga depensa laban sa mga malubhang sakit. Makatutulong din ang pagkakaroon ng kumpletong bakuna ng iyong sanggol na mapababa ang kanyang panganib sa SIDS. Marami ang ibinibigay sa isang serye ng mga dosis. Upang maprotektahan, kailangan ng iyong sanggol ang bawat dosis sa tamang oras. Magagamit ang maraming kombinasyon ng mga bakuna. Maaaring makatulong ang mga ito na mabawasan ang bilang ng kinakailangang mga karayom upang mabakunahan ang iyong sanggol laban sa lahat ng mahalagang sakit na ito. Makipag-usap sa tagapangalaga ng kalusugan ng iyong sanggol tungkol sa mga benepisyo ng mga bakuna at anumang panganib na maaaring magkaroon siya. Itanong din kung ano ang gagawin kung malampasan ng iyong sanggol ang isang dosis. Kung mangyari ito, kakailanganin ng iyong sanggol na humabol sa mga bakuna upang lubusang maprotektahan. Pagkatapos mabakunahan, may banayad na masasamang epekto sa ilang sanggol, tulad ng pamumula at pamamaga kung saan itinurok ang bakuna, lagnat, pagiging maselan, o pagkaantok. Makipag-usap sa tagapangalaga tungkol sa kung paano pamamahalaan ang mga sintomas na ito.