Pagpapaligo sa Iyong Bagong Silang na Sanggol

Mahalaga

Huwag iwanang mag-isa ang iyong sanggol malapit sa tubig—kahit pa ilang segundo! Kung dapat kang umalis sa kuwarto sa oras ng pagpapaligo, palaging isama ang iyong sanggol.

Hakbang 1. Hugasan ang mukha ng iyong sanggol

• Gumamit ng maligamgam na tubig sa isang malinis at malambot na tela o bulak. Huwag lagyan ng sabon.

• Marahang punasan ang mga mata. Para iwasan ang impeksiyon, gamitin ang isang malinis na parte ng tela para sa bawat mata. Punasan mula sa panloob na sulok ng mata palabas.

• Hugasan ang likod ng tainga ng sanggol at ang ilalim ng baba.

Hakbang 2. Paliguan ang katawan, mga braso, at mga hita

• Maglagay ng kaunting banayad at walang amoy na sabon sa isang malinis at basang tela.

• Linisin sa pagitan sa anumang tiklop ng balat.

• Ibuka ang mga daliri ng sangggol at punasan ang mga palad. Hugasan ang ilalim ng mga braso ng sanggol at sa likod ng parehong tuhod.

• Kung madumihan ang pusod ng iyong sanggol, linisin ito ng tubig at hayaang matuyo.

• Punasan ang iyong sanggol hanggang sa malaglag ang pusod at maghilom ang bahagi. Kung mabasa ito, ilantad ang bahagi sa hangin para matuyo ito.

Hakbang 3. Hugasan ang puwit ng iyong sanggol

• Paliguan ang puwit ng sanggol pagkatapos ng lahat ng katawan.

• Hugasan ang ari ng mga babae paharap hanggang palikod lamang.

• Huwag kailanman puwersahing iurong ang balat ng hindi pa tuli na ari.

Hakbang 4. Pangalagaan ang anit ng sanggol

• Marahang kuskusin o suklayin ang anit ng iyong sanggol sa bawat araw.

• Hugasan ang anit ng sanggol 1 o 2 beses sa isang linggo. Gumamit ng banayad na shampoo na hindi nakakahilam ng mata. Maiiwasan nito ang cradle cap. Isa itong pantal sa balat na katulad ng balakubak. Karaniwan ito sa mga sanggol. Maaari mong balutin ang iyong sanggol sa isang maligamgam na tuwalya at pagkatapos, hugasan ang kanyang anit at buhok.

• Bihirang mangailangan ng mga lotion o pulbos ang mga bagong silang na sanggol. Kung gusto mong gumamit ng lotion, pumili ng isang hypoallergenic. Kung pinili mong gumamit ng mga pulbos, maglagay muna ng pulbos sa iyong mga kamay. At ikuskos ito sa balat ng iyong sanggol. Kung malanghap ng sanggol ang pulbos, maaari itong magdulot ng mga problema sa baga.